Azərbaycan və Yaponiya elm və idman sahəsində əməkdaşlıq məsələlərini müzakirə edib

Bakı. 19 fevral. REPORT.AZ/ Azərbaycanın Yaponiyadakı səfiri Gürsel İsmayılzadə bu ölkənin təhsil, mədəniyyət, idman və texnologiya naziri Hiroşi Hase ilə görüşüb.

"Report" xəbər verir ki, görüş zamanı geniş səpkili məsələlər, o cümlədən idman, təhsil, elm və texnologiya sahəsində əməkdaşlığın inkişafı məsələləri müzakirə olunub.

Görüşdə Bakının ilk Avropa Oyunlarının keçirilməsindəki müvəffəqiyyətli fəaliyyətinə də toxunulub. Səfir yapon nazirə "Formula-1" üzrə Avropa Qran-Prisi, İslam Həmrəyliyi Oyunları, eləcə də AVRO-2020 çərçivəsində futbol matçları kimi yaxın gələcəkdə paytaxtımızda keçiriləcək vacib idman hadisələrindən bəhs edib.