Yasamal seçiciləri: "Birmənalı olaraq Ülvi Quliyevə səs verəcəyik" - FOTO

Bakı. 30 oktyabr. REPORT.AZ/ 15 saylı Yasamal birinci seçki dairəsindən deputatlığa namizəd Ülvi Quliyev seçicilərlə görüşlərini başa çatdırıb. 

"Report" xəbər verir ki, deputatlığa namizəd seçki kampaniyasını “Sağlam gələcək Ülvi ilə gələcək” şüarı altında aparıb.

Ü.Quliyevin nümayəndələri təbliğat kampaniyası dövründə 15 saylı Yasamal birinci seçki dairəsində demək olar ki, əksər evlərdə olub. Bununla yanaşı deputatlığa namizədin seçki qərargahında hər gün seçicilərlə təmas qurulub. Paralel olaraq seçicilərlə görüş üçün nəzərdə tutulmuş yerlərdə də Ülvi Quliyev seçicilərlə görüşüb. Seçki qərargahından verilən məlumata görə, təbliğat-təşviqat kampaniyası dövründə bütün seçicilərlə maksimum dərəcədə təmas qurulub. 

Təbliğat kampaniyası çərçivəsində keçirilən belə möhtəşəm görüşlərdən birində idmançılar-Birinci Avropa Oyunlarının qalibləri, dünya və Avropa çempionları, ziyalılar, dindarlar geniş şəkildə iştirak ediblər.

Ümumilikdə, Yasamal seçiciləri Ülvi Quliyevin görüşlərinə böyük maraq göstəriblər. Görüşlər seçicilərin fəallığı ilə keçib.

Keçirilən görüşlərdə Ülvi Quliyev əsas hədəflərini açıqlayıb. O, göstərdikləri etimada görə seçicilərə təşəkkürünü bildirib. Deputatlığa namizəd qeyd edib ki, bundan öncə, III və IV çağırışda Milli Məclisin deputatı olub: “Heç şübhəsiz ki, sizlərin dəstəyi sayəsində deputat seçilmişəm. Hazırda Sizin yaşadığınız dairədən namizədliyimi irəli sürmüşəm. Ötən seçkilərdə olduğu kimi bu dəfə də dəstəyi yalnız sizdən gözləyirəm”.

Ü.Quliyev qeyd edib ki, hansı sahədə çalışmasından asılı olmayaraq dövlət, dövlətçilik, milli-mənəvi dəyərlər, qanunun aliliyi, ölkə Prezidentinin həyata keçirdiyi siyasət onun üçün əsasdır, bundan sonra da qarşıya qoyduğu bu prinsiplərə sadıq qalacaq. O, seçicilərə bildirib ki, bundan əvvəl iki çağırış deputat olduğu dövürdə daim seçicilərlə əlaqədə olub: “Seçicilərin etimadını doğrultmaq hər bir deputatın borcudur. Mən də bunu özümə borc hesab edirəm. Dediklərimi əməlimlə göstərmişəm. Verdiyim sözə sadiq qalmışam. Bizim prinsipimiz az danışıb çox iş görməkdir. Bu günə qədər hər zaman qapımız bütün seçicilərin üzünə açıq olub.

Təbii ki, sizin müraciət etdiyiniz bütün məsələlər deputatın səlahiyyətinə aid olmur. Deputat başlıca olaraq qanun yaradıcılığı ilə məşğul olur. Bundan başqa ayrı-ayrı ölkələrlə parlamentlərarasə əlaqələrin qurulması, xalqlar, millətlər arasında münasibətlərin istiləşməsi, Qarabağ məsələsinin beynəlxalq ictimaiyyətə çatdırılması bizim işimizdir. Və seçicilərlə mütəmadi işləmək, onların qaldırdıqları məsələləri müvafiq qurumlara çatdırmaq. səlahiyyətimiz çərçivəsində həll etmək borcumuzdur. Mən bu günə qədər belə işləmişəm və etimad göstərəcəyiniz təqdirdə fəaliyyətimi bu şəkildə davam etdirəcəm”.

Ü.Quliyev opponentlərin ona qarşı qara piar kampaniyası apardığını da dilə gətirib: “Mən onlardan fərqli olaraq belə məsələlərin tam əleyhinəyəm. Onlara məsləhət verirəm ki, vaxtlarını belə lazımsız məsələlərə sərf etməkdənsə, seçicilərlə işləsinlər. Yalan vədlər deyil, gerçək məsələlərdən danışsınlar. Rəqibləri normal mübarizəyə səsləyirəm. Məğlub qalibin əlini sıxmağı bacarmalıdır”. 

Ülvi Quliyev seçicilərə müraciət edərək noyabrın 1-də fəal olmağa, seçkilərə qatılmağa, etimadlarını doğruldacaq namizədə səs verməyə çağırıb.

Seçicilər isə bildiriblər ki, noyabrın 1-də birmənalı olaraq Ülvi Quliyevə səs verəcəklər.