​Şahin Mustafayev: "Aviabiletlərin qiymətlərinin aşağı salınması istiqamətində tədbirlər görülür"

Bakı. 23 iyul. REPORT.AZ/ Dövlət başçısının tapşırığına uyğun olaraq, aidiyyəti dövlət qurumları ilə birlikdə aviabiletlərin qiymətlərinin təhlili aparılır və qiymətlərin aşağı salınması istiqamətində tədbirlərin həyata keçirilməsinə başlanıb. "Report"un verdiyi məlumata görə, bu barədə iqtisadiyyat və sənaye naziri Şahin Mustafayev bu gün nazirlikdə keçirilən kollegiya iclasında məlumat verib.

Nazir həmçinin dərman vasitələrinin qiymətlərinin tənzimlənməsi məsələsi barədə də danışıb: "Bu sahədə qanunvericilik bazası yaradılıb, qiymətlərin tənzimlənməsi mexanizmi hazırlanıb. Dərman vasitələrinin qiymətlərinin tənzimlənməsi sahəsində həyata keçirilən tədbirlər yaxın vaxtlarda qiymətlərin əhəmiyyətli dərəcədə aşağı düşməsinə imkan verəcək. Bununla yanaşı, dərman satışı bazarında keyfiyyətə xüsusi diqqət yetiriləcək".