Bakı. 5 oktyabr. REPORT.AZ/ "Azərbaycanda bu ilin yanvar-sentyabr aylarında nikaha daxil olmaq istəyən 110 min nəfər tibbi müayinədən keçib. Onların 3 597 nəfərində talassemiya daşıyıcılığı aşkarlanıb".
"Report"un məlumatına görə, bunu respublikanın baş hematoloqu Çingiz Əsədov deyib.
O bildirib ki, bu cütlüklərə daxil olan qadınların 12-də hamiləlik olub: "Həmin qadınların müayinəsi zamanı doğulacaq uşaqların 1-nin sağlam, 8-nin talassemiya daşıyıcısı olduğu, 3-nün isə xəstə olduğu məlum olub. Buna görə də 3 qadının bətnindəki döl tibbi abort vasitəsilə götürülüb".
Ç.Əsədov qeyd edib ki, Azərbaycanda hər il təqribən 180 minə yaxın şəxs evlənir: "Həmin şəxslərin tibbi müayinəsi Azərbaycanın regionlarında Mərkəzi Rayon Xəstəxanaların və ya Şəhər Xəstəxanalarının, Şəhər Səhiyyə Şöbələrinin əvvəlcədən müəyyən edilmiş tibb müəssisələri, Bakı şəhərində hər inzibati rayonda təyin olunmuş poliklinikalar, Hematologiya və Transfiziologiya İnstitutu, Mərkəzi Qan Bankı və onun şəhər (rayon) bölmələri, Respublika Perinatal Mərkəzi həyata keçirir. Bütün rayon və şəhər səhiyyə müəssisələri yerlərdə müayinə aparılması üçün ən yaxşı hematoloji analizator, reaktivlər və müvafiq ləvazimatlarla təmin olunublar. Götürülmüş qan nümunələrinin Bakı şəhərinə çatdırılması üçün Xüsusi Qan Xidməti avtomobilləri ayrılıb və marşrutları müəyyən edilib. Rayon Mərkəzi Xəstəxanaları və şəhər səhiyyə idarələrinin müəyyən olunmuş tibb müəssisələrində də hematoloji kabinetlər yaradılıb".
Baş hematoloqun sözlərinə görə, tibbi müayinədən keçən şəxslərin qan analizlərinin götürüldüyü sınaq şüşələrin qarışması ehtimalı yoxdur: "Əvvəllər sınaq şüşələrinin bir-birinə qarışması ehtimalı var idi. Sonradan Səhiyyə Nazirliyinin xüsusi proqram təminatı vasitəsilə ştrix kodlar hazırlanıldı. Bu kompüter proqramının sayəsində hazırda sınaq şüşələrinin bir-birinə qarışması, səhv düşməsi mümkün deyil."