Bakı. 22 oktyabr. REPORT.AZ/ "Bu ilin 9 ayı ərzində 1 saylı Kliniki Tibbi Mərkəzin (KTM) Toksikologiya şöbəsinə 116 nəfər dəm qazından zəhərlənmə diaqnozu ilə müraciət edib". Bu barədə "Report"a KTM-in Toksikologiya şöbəsinin müdiri Azər Maqsudov məlumat verib.
Şöbə müdirinin sözlərinə görə, ötən müddətdə dərmanın əlavə təsirindən allergik reaksiya ilə bağlı klinikaya 78 nəfər müraciət edib: "Dərmandan zəhərlənmə halları əsasən Bakıda qeydə alınıb. Bundan başqa, 18 nəfər sirkə turşusundan zəhərlənib, onlardan da ikisi dünyasını dəyişib".
A.Maqsudov onu da qeyd edib ki, yanvar-sentyabr aylarında 91 nəfər ilan sancmaları, 14 nəfər qara qurd dişləməsi, 27 nəfər isə əqrəb sancması ilə əlaqədar şöbəyə qəbul edilib.