Alimlər qan analizi ilə ruhi pozulmaları müəyyən edə bilir

Bakı. 19 avqust. REPORT.AZ/ Novosibirsk kimyəvi biologiya və fundamental təbabət institutunun alimləri ilk dəfə olaraq qan analizlərində ağır ruhi pozulmalara meyilli xəstələri müəyyən etməyə imkan verən bioloji markerləri aşkar etməyə müvəffəq olublar. 

"Report" Rusiya KİV-inə istinadən xəbər verir ki, söhbət şəxsi münasibətlərin pozulması və hətta intihara gətirib çıxaran maniakal-depressiv sindromdan gedir. Statistikaya əsasən, həmin xəstəlikdən planetin 1,4% əhalisi əziyyət çəkir. İnstitutun elmi əməkdaşlarından birinin fikrincə, düzgün diaqnozun qoyulması və nəticə etibarilə müalicə metodunun seçilməsi üçün bir analiz kifayət edəcək.  

Eksperiment ruhi pozulmaları olan 10 xəstə və 10 sağlam insanın üzərində aparılıb. Nəticədə bir neçə zülalların ekspressiya səviyyəsinin neyropsixi xəstəliyin mövcudluğu ilə birbaşa asılılığı müəyyən olunub. Xüsusilə bipolyar pozulması olan insanlarda 2 zülalın səviyyəsi azalıb. Onlardan biri infeksiyalarla mübarizəyə görə, digəri isə qalxanvari vəzinin pozulmalarına səbəb olan triyodtironinin nəqlinə görə cavabdehdir.