Bakı. 8 avqust. REPORT.AZ/ İranın keçmiş prezidenti Mahmud Əhmədinejat ABŞ prezidenti Barak Obamaya məktubla müraciət edib.
"Report" xəbər verir ki, bu barədə İran KİV-i məlumat yayıb.
Həmin məktub avqustun 8-də İsveçrənin İrandakı səfirliyinə təqdim edilib.
İranın 9 və 10-cu prezidenti Mahmud Əhmədinejat məktubda İslam Respublikasının 2 milard dollarlıq əmlakını verməsini istəyib. O, ABŞ-ın İrana qarşı siyasətini də tənqid atəşinə tutub.
Qeyd edək ki, ABŞ-ın Ali Məhkəməsi 2014-cü il iyulun 9-da İranın 2 milyard dollarlıq əmlakına həbs qoyub. 2016-cı il aprelin 20-də isə həmin məhkəmə İranın bu ölkədə dondurulmuş bank hesablarından 2,65 milyard dolların amerikalı zərərçəkən ailələrə verilməsi haqqında qərar qəbul edib.
Məlumata görə, bu məbləğ ABŞ-ın terrordan zərərgörən 241 əsgərinin ailəsinə veriləcək.
Xatırladaq ki, 1983-cü ilin oktyabrın 23-də Livanın paytaxtı Beyrutda "İslami-Cihad" və "Hizbullah"ın ABŞ-ın Hərbi Dəniz Qüvvələrinə məxsus kazarmalarını partlatması nəticəsində 241 amerikalı, Fransa bazasının partladılması nəticəsində 58 fransız əsgər həlak olub.
1979-cu il islam inqilabından sonra İranın ABŞ banklarındakı hesabları dondurulmuşdu. Ötən ilin yayında İslam Respublikası ilə beynəlxalq vasitəçilər arasında əldə edilən razılaşmadan sonra həmin hesablara qoyulan sanksiyalar yumşaldılıb.