Bakı.17 fevral. REPORT.AZ/ Gürcüstan Baş Prokurorluğu Ukrayna Baş Prokurorluğuna Mixail Saakaşvilinin ekstradisiyası ilə bağlı müraciət edib.
"Report"un xəbərinə görə, bu barədə Gürcüstan Baş Prokurorluğu fevralın 17-də məlumat yayıb.
"Mixail Saakaşviliyə ittiham irəli sürülüb və ölkə daxilində onun barəsində axtarış elan olunub. Baş Prokurorluq Ukrayna Baş Prokurorluğuna Saakaşvilinin saxlanılaraq, Gürcüstana təhvil verilməsi haqda müraciət edib", - məlumatda bildirilib.
İki ölkə arasında ekstradisiya sahəsində razılaşma olmasına baxmayaraq, Ukrayna tərəfi Gürcüstanla əməkdaşlıqdan və Mixail Saakaşvilini təhvili verməkdən imtina edir.
Xatırladaq ki, fevralın 14-də Ukrayna prezidenti Pyotr Poroşenkonun sərəncamı ilə prezident yanında islahatlar üzrə beynəlxalq məsləhət şurasına Gürcüstanın keçmiş prezidenti Mixail Saakaşvili sədr təyin edilib.