Bakı. 17 avqust. REPORT.AZ/ ABŞ rəsmiləri ilə PKK terror təşkilatının təmsilçiləri arasında gizli görüşlər keçirilir.
"Report" Türkiyə KİV-inə istinadən xəbər verir ki, bunu Böyük Britaniyanın "Daily Telegraph" qəzeti yazıb.
Bu, qəzetin terrorçu təşkilatın liderlərindən Cəmil Bayıkla müsahibəsindən sonra məlum olub.
C.Bayık qəzetə bildirib ki, onlar ABŞ-la qarşılıqlı mesajlaşır, toplantılar keçirir, məktublaşırlar: "Bu əlaqələrin inkişaf etməsi də mümkündür. ABŞ-ın Türkiyə ilə aramızda vasitəçilik etməsi də vacibdir. Bizə bununla bağlı təminat verilərsə, o zaman üzərimizə düşən missiyanı yerinə yetirərik. Ancaq təminat verilməzsə, birtərəfli addım da atmayacağıq. Əgər ABŞ Türkiyənin siyasətini dəstəkləyərsə, kürdləri itirəcək. ABŞ kürdləri itirərsə, onda "İŞİD"in məğlubiyyəti çətinləşəcək".