Azərbaycan boksçularının Dünya Təsnifat Turnirindəki rəqibləri müəyyənləşir

Bakı. 17 iyun. REPORT.AZ/ Bakıda 2016-cı il Rio-de-Janeyro Yay Olimpiya Oyunlarına lisenziya xarakterli boks üzrə Dünya Təsnifat Turnirinə start verilib. "Report"un məlumatına görə, yarışda Azərbaycanı 3 boksçu təmsil edir. 

İlk olaraq 75 kq-da yarışacaq Kamran Şahsuvarlının rəqibi məlum olacaq. Bu gün albaniyalı Aryon Kayoşi və belçikalı Lay Kalenqa Mişika arasında keçiriləcək döyüşün qalibi 1/16 finalda Şahsuvarlı ilə görüşəcək. Rəqiblər iyunun 20-də üz-üzə gələcək.

81 kq çəkidə mübarizə aparan Teymur Məmmədovun da 1/16 finaldakı rəqibi bu gün axşam müəyyənləşəcək. Həmin görüşdə rinqə tacikistanlı Mexrubon Sanginov və çinli Şi Quojun rinqə çıxacaq. 1/16 final mərhələsinin döyüşü iyunun 19-da olacaq.

49 kq-da çıxış edən Rüfət Hüseynovun rəqibi isə sabahkı döyüşdə müəyyənləşəcək. Dominikan Respublikasından olan Santilyan Perez Viktor Daniel Çin Taybeyi idmançısı Tu Po-Veylə qarşılaşacaq və qalib 1/8 finalda azərbaycanlı boksçuya qarşı mübarizə aparacaq. Bu döyüş iyunun 20-də baş tutacaq.

Qeyd edək ki, "Sərhədçi" İdman Olimpiya Mərkəzində keçirilən Dünya Təsnifat Turniri iyunun 25-dək davam edəcək. 52 kq, 56 kq, 60 kq, 64 kq, 69 kq, 75 kq və 81 kq çəkilərdə olimpiadaya lisenziyanı ilk 5 yeri tutan idmançılar əldə edəcək. Başqa sözlə, yarımfinaladək irəliləyənlərlə yanaşı, öz çəkisinin qalibinə 1/4 finalda uduzan boksçu vəsiqə sahibi olacaq. 49 kq-da finalçılar, 91 kq və +91 kq çəkilərdə isə yalnız birinci pillənin sahibləri Rio-de-Janeyroya yollana biləcəklər. Azərbaycan boksçuları turnirə indiyədək lisenziya qazana bilmədikləri 49 kq, 75 kq və 81 kq çəkilərdə qatılıb. Bunlar müvafiq olaraq, Rüfət Hüseynov, Kamran Şahsuvarlı və Teymur Məmmədovdur.