"Report": Azərbaycan bank sektorunun aktivləri daha 10-15% artacaq

Bakı. 4 fevral. REPORT.AZ/ Azərbaycan bank sektorunun məcmu aktivləri 2015-ci ilin dekabr ayında 6 360,1 mln. manat və ya 22,35% artaraq 2016-cı il yanvarın 1-nə 34 906 mln. manat təşkil edib.

"Report"un Azərbaycan Mərkəzi Bankına (AMB) istinadən verdiyi xəbərə görə, keçən ilin əvvəlinə nisbətən aktivlərin həcmi 9 723,5 mln. manat və ya 38,61% artıb. 

"Report"un analitik qrupu dekabr ayında bank sektorunun aktivlərində baş verən kəskin artımı dekabrın 21-də həyata keçirilən milli valyutanın 48%-lik  devalvasiyası ilə əsaslandırıb. Xarici valyutada olan kredit və əmanətlərin manat ekvivalentində artmasına səbəb olub.

"Report" hesab edir ki, yaxın günlərdə əmanətlərin tam sığortalanması və əmanət dividendlərinin gəlir vergisindən azad olunması ilə bağlı təsdiqi gözlənilən qərarlar bank sektorunun aktivlərini daha 10-15% artıraraq 40 mlrd. manata çatdıracaq.