Bakı. 19 may. REPORT.AZ/ "İnkişaf Mərkəzi" İnstitutunun keçirdiyi sorğuda iştirak edən peşəkar tədqiqatçılar Rusiyada 2015-ci ildə gözlənilən iqtisadi geriləmənin nisbətən mülayim olacağını proqnozlaşdırırlar.
"Report" xəbər verir ki, fevral ayında keçirilən əvvəlki sorğuda gözlənilən ÜDM azalması ortalama 4% təşkil edirdisə, maydakı sorğuda azalma ortalama 3,6%-ə qədər geriləyib. Gələn il isə sorğu iştirakçılarının çoxu mülayim iqtisadi artım gözləyir: 32 ekspertdən 7-si gələn il resessiyanın davam edəcəyini ehtimal edir.
Sorğuda "Alfa-bank", "The Boston Consulting Group", "Morgan Stanley" və s. böyük və nüfuzlu maliyyə təşkilatları iştirak edib. Buna baxmayaraq, ilin qalan hissəsində ÜDM azalması daha kəskin olacaq. Çünki I rübdə azalma cəmi 1,9% olub. Bu da qarşıdakı aylarda 4,2%-lik azalmanın olacağını göstərir və bu, ilk rübdəki azalmadan 2 dəfədən də çoxdur.
Qeyd edək ki, bununla yanaşı, "Bank of Amerika" Rusiya iqtisadiyyatındakı azalma ilə bağlı proqnozunu 4%-dən 2,8%-ə qədər yaxşılaşdırıb, 2016-cı il üçün proqnozu isə müsbət 0,9%-dən 1,1%-ə yüksəldib.
Digər böyük investisiya bankı olan "Morgan Stanley" də 2015-ci il üçün iqtisadi geriləmə ilə bağlı proqnozunu 5%-dən 4%-ə endirib.
"Sberbank"ın baş iqtisadçısı Yevgeniy Qavrilenkov isə bildirib ki, önəmli olan Rusiyanın bir neçə il öncə girdiyi iqtisadi yavaşlamadan qurtulmasıdır.
Qeyd edək ki, mayın 15-də Rusiya baş nazirinin müavini İqor Şuvalov ölkədə iqtisadi böhranın artıq bitdiyini bildirib. "Rosbank"ın İdarə Heyətinin sədri Dmitri Olyunin isə böhranın hələ bitmədiyini, sadəcə, maliyyə bazarında yüksək volatilliyin azaldığını qeyd edib.