Azərbaycan Beynəlxalq Bankında yeni təyinat olub

Bakı. 6 sentyabr. REPORT.AZ/ "Azərbaycan Beynəlxalq Bankı" ASC-yə (ABB) yeni baş direktor təyin edilib. "Report" xəbər verir ki, bu vəzifəyə Abbas Vaqif oğlu Nəsibov gətirilib.

A.Nəsibov bundan öncə "Bank Standard" QSC-nin İdarə Heyətinin sədri olub.

Yeni təyinatla ABB-nin baş direktorlarının sayı 3-ə çatıb. Digər baş direktorlar Hidayət Qurban oğlu Sultanov və Fuad Rafiq oğlu İslamovdur.

Xatırladaq ki, ABB 1992-ci ildə yaradılıb. Onun nizamnamə kapitalı 641 287 250 manatdır. Bu məbləğ hər birinin nominal dəyəri 0,27 manat olan təxminən 2 375 138 000 səhm əsasında formalaşıb. Səhmlərin 54,96%-i Azərbaycan hökuməti adından çıxış edən Maliyyə Nazirliyinə, 27,26%-i "Aqrarkredit" QSC-yə, 17,78%-i isə qeyri-dövlət müəssisələrinə və fiziki şəxslərə məxsusdur.