"Rabitəbank" Özəl Sektorun İnkişafı üzrə İslam Korporasiyası ilə 15 milyon ABŞ dolları dəyərində müqavilə imzalayıb

"Rabitəbank" ASC Özəl Sektorun İnkişafı üzrə İslam Korporasiyası ilə 15 milyon ABŞ dolları dəyərində müqavilə imzalayıb.

Müqaviləni "Rabitəbank"ın İdarə Heyətinin sədri Aydın Hüseynov və Ticarətin Maliyyələşdirilməsi üzrə Beynəlxalq İslam Korporasiyasının (ITFC) Baş icraçı direktoru, eləcə də Özəl Sektorun İnkişafı üzrə İslam Korporasiyasının (ICD - İslam İnkişaf Bankı qrupuna (IsDB) daxildir) baş direktoru vəzifəsini icra edən Hani Salem Sonbol imzalayıblar.

Tərəflər ölkə iqtisadiyyatının inkişafı istiqamətində IsDB ilə əməkdaşlığı, Azərbaycanda ticarətin maliyyələşdirilməsini, kiçik və orta biznesə (KOB) dəstək imkanlarının genişləndirilməsini müzakirə ediblər. Eləcə də islam maliyyəsinin tətbiqində Korporasiyanın roluna diqqət ayıraraq, bu istiqamətdə atılacaq növbəti birgə addımlara dair fikir mübadiləsi aparılıb. Müqavilə islam maliyyəsi prinsiplərinə uyğun olaraq kiçik və orta biznesə dəstək olmaqla, özəl sektorun müştərilərinin müxtəlif ehtiyaclarının qarşılanması üçün ticarətin maliyyələşdirilməsi mexanizmlərinin yaradılmasını nəzərdə tutur.

"Biz Özəl Sektorun İnkişafı üzrə İslam Korporasiyası ilə bu mühüm sazişi imzalamaqdan və Azərbaycanda iqtisadi artımın təşviqinə dəstək verməkdən məmnunuq. Bu tərəfdaşlıq Rabitəbankın kiçik və orta biznesin inkişafını dəstəklədiyinə dair öhdəliyini vurğulayır. Milli iqtisadiyyatımızın inkişafına töhfə vermək üçün ticarətin maliyyələşdirilməsi təşəbbüslərini irəli sürmək və özəl sektor müştərilərimizi gücləndirmək üçün islam maliyyəsi prinsipləri ilə irəliləməyi hədəfləyirik", - deyə A.Hüseynov vurğulayıb.

"Rabitəbank" ilə bu əməkdaşlıq Azərbaycanda ticari maliyyələşdirmə üzrə daimi səylərimizdə konkret addımdır. Məqsədimiz lazımi maliyyə vasitələri və resursları təqdim etməklə özəl sektorun, xüsusilə də KOB-un inkişafını stimullaşdırmaqdır. Bu saziş İslam maliyyəsi prinsiplərinə əsaslanaraq milli iqtisadiyyatın inkişafına töhfə vermək səylərimizdə mühüm mərhələni təmsil edir", - deyə H.S.Sonbol qeyd edib.

"Rabitəbank" 16 region və Bakı şəhəri üzrə ümumilikdə 28 xidmət məntəqəsi, 74 ATM-i, "Rabita Mobile" tətbiqi, İnternet Bankçılıq platforması, "RabitaBot" çatbotu və 133 nömrəli Çağrı Mərkəzi ilə müştərilərin xidmətindədir.