Bakı. 8 may. REPORT.AZ/ "Mən təqib qrupunda idim. Məqsədim liderlərdən geri qalmamaq idi. Amma öndəkilərin yorulduqlarını gördükdən sonra sürəti artıraraq liderliyi ələ keçirdim". "Report"un məlumatına görə, bunu "Tour d` Azerbaidjan" veloyürüşünün III mərhələsinin yekunlarına həsr olunmuş mətbuat konfransında İrlandiyanın "An Post - Chain Reaction" klubunun üzvü Coşua Tomas Edmondson deyib.
O qeyd edib ki, son iki gün ərzində səhhətində yaranan problemlər üzündən yürüş zamanı həkimlərə müraciət etməli olub: "Bir az hərarətim vardı. Ona görə də dünən və bu gün də həkimlərə yaxınlaşdım".
İlk 3 mərhələnin yekununda liderliyi ələ alan Sloveniyanın "Adria Mobil" klubunun üzvü Primoj Roqliç isə buna komanda yoldaşlarının köməyi sayəsində nail olduğunu bildirib: "Məqsədimiz liderliyi qorumaq idi. Ona görə də komandam mənə kömək etdi və bunu bacardıq".
İkinci dəfə mükafatçılar sırasına düşən Sloveniya klubunun daha bir üzvü Marko Kump "Tour d`Azerbaidjan"ın yüksək səviyyədə təşkil olunduğunu açıqlayıb. O, yolların kənarında daha çox insanın olmasını da təqdir edib. Amma Kumpun fikrincə, bu mərhələdə yolların vəziyyəti əvvəlki mərhələ ilə müqayisədə o qədər də yaxşı olmayıb.
Azərbaycanın "Synergy Baku" klubunun üzvü, dağ mərhələsinin qalibi Aleksandr Surutkoviç isə II mərhələ ilə müqayisədə bu dəfə liderliyi əldən vermədiklərini vurğulayıb: "Ötən gün iki məsafədə finişi qazandıq. Lakin sonda qələbəni əldən verdik. Bu gün isə bizi izləyənlərlə fərqi artırmaq lazım idi ki, daha irəli çıxa bilək. Sevinirəm ki, sonda bu alındı".