Xudat-Yalama-Zuxuloba avtomobil yolunun tikintisi davam etdirilir - VİDEOREPORTAJ - FOTO

Bakı. 19 iyul. REPORT.AZ/ Xaçmaz rayonunun Xudat-Yalama-Zuxuloba avtomobil yolunun yenidənqurma işləri texnoloji ardıcıllığa riayət olunmaqla davam etdirilir. Uzunluğu 23 km olan yol uzun müddət əsaslı təmir olunmadığı üçün, xüsusən də ağır tonnajlı yük maşınlarının intensiv hərəkəti nəticəsində  yolun hərəkət hissəsi bir çox yerlərdə qabarmış və dağılmış vəziyyətdə idi. Bu isə həmin yolla avtonəqliyyat vasitələrinin gediş-gəlişində problemlər yaradırdı. Tikinti işlərini həyata keçirən "Azəravtoyol" ASC-nin mətbuat xidmətindən "Report"a daxil olan xəbərə görə, Xudat-Yalama-Zuxuloba avtomobil yolunda müasir yol infrastrukturu yaradılmaqla bu problemlər köklü şəkildə öz həllini tapır.

Layihə çərçivəsində yol əsasının yararsız qruntu qazılaraq çıxarılıb, qazılmış hissələrə karbonat materialı tökülərək kipləşdirilib. Ümumilikdə 12 metr enində yeni yol yatağı tikilib. Tikinti işlərindən öncə eni 6 metr olan yolun hərəkət hissəsi III texniki dərəcəyə uyğun olaraq 7 metrə qədər genişləndirilir. Hər biri 3,5 metr enində olmaqla 2 hərəkət zolaqlı yolun hər iki istiqaməti üzrə 2,5 metr enində yeni çiyinlər tikilərək, bərkidilib. Bura 0,5 metr enində bərkidici zolaqlar da daxildir.

Hər bir layihənin reallaşdırılması zamanı yollarda piyadaların da təhlükəsiz hərəkəti diqqətdə saxlanılan əsas məsələlərdən biridir. Bu üzdən yolların yaşayış məntəqələrindən keçən hissələrində vətəndaşların normal və təhlükəsiz hərəkəti üçün piyada səkiləri yaradılır. Xudat-Yalama-Zuxuloba avtomobil yolunda da ümumi uzunluğu 4 min paqon-metrə yaxın 2 metr enində yeni piyada səkiləri tikilir, kənarlarına səki daşları düzülür. Yenidənqurma işləri çərçivəsində avtomobil yolunun alt hissəsindən suların ötürülməsi üçün nəzərdə tutulan mövcud boruların və keçidlərin hamısı bərpa olunub.

Hazırda yol boyu asfaltlanma işləri aparılır. Ümumilikdə 165 min kv. m sahəyə yeni asfalt-beton örtüyünün döşənməsi nəzərdə tutulub. Artıq yolun 16 km-də yenidənqurma işləri başa çatdırılıb, qalan 7 km-də isə işlər keyfiyyətlə davam etdirilir. İşlərin avqust ayının sonuna qədər yekunlaşdırılması planlaşdırılır.

Tikinti işləri yekunlaşandan sonra yolun zəruri olan yerlərinə yol nişanları quraşdırılacaq, piyada zolaqlarının, həmçinin yol cizgi və yol göstərici xətlərin çəkilişi işləri aparılacaq.

8 yaşayış məntəqəsini birləşdirən Xudat-Yalama-Zuxuloba avtomobil yolunun tikintisi ilə 28 min nəfər əhalinin gediş-gəlişi xeyli asanlaşacaq, onların avtomobil yolundan istifadə edərək tədarük etdikləri kənd təsərrüfatı məhsullarını və meyvə-tərəvəzi sürətlə, qısa vaxt ərzində xarab olmadan istədikləri ünvanlara çatdırmağa imkan yaranacaq.