Bakı. 4 iyun. REPORT.AZ/ Bakı şəhəri Nizami rayonunun Qara Qarayev prospektində aparılan təmir işləri ilə əlaqədar yolun bağlanan hissəsində hərəkət bərpa olunacaq. "Azəravtoyol" ASC-dən "Report"a daxil olan xəbərə görə, aparılan təmir işləri ilə əlaqədar iyulun 4-dən 5-nə keçən gecə prospektin Şirin Mirzəyev küçəsindən ("Qara Qarayev" metro stansiyası) Rüstəm Rüstəmov küçəsinə qədər ("Neftçilər" metro stansiyası) olan hissəsində təmirdən sonra avtonəqliyyat vasitələri yenidən hərəkət edəcək.
Bundan başqa, əks istiqamətdə - R.Rüstəmov küçəsindən Ş.Mirzəyev küçəsinə qədər olan hissədə isə təmir işləri ilə əlaqədar hərəkətə qısamüddətli məhdudiyyət tətbiq olunacaq.
Sürücülərə təmir işləri aparılan müddət ərzində alternativ olaraq Rüstəm Rüstəmov, Bəkir Çobanzadə və Mikayıl Əliyev küçələrindən istifadə etmələri tövsiyə olunur.