​Komitə rəsmisi: "Bütün sualları Baş Prokurorluğa ünvanlayın"

Bakı. 20 may. REPORT.AZ/ Azərbaycan Standartlaşdırma, Metrologiya və Patent üzrə Dövlət Komitəsi 2012-ci ildə "Global Stone" şirkətinə poliuretan məhsullarına uyğunluq sertifikatının verilməsi faktına şərh verməkdən imtina edib.  

"Mən də bu fotonu sosial şəbəkələrdə görmüşəm və orada vaxtı keçmiş sertifikat paylaşılıb". Bunu "Report"a Standartlaşdırma, Metrologiya və Patent üzrə Dövlət Komitəsinin mətbuat xidmətinin rəhbəri Fazil Talıblı deyib.

F.Talıblı ötən gün Bakının Binəqədi rayonunda yanan 16 mərtəbəli yaşayış binası ilə bağlı hazırda xüsusi komissiyanın fəaliyyət göstərdiyini və komissiyanın qərarından öncə hansısa açıqlama verilməsinin düzgün olmadığını bildirib: "Hazırda dövlət başçısının sərəncamı ilə komissiya işləyir və onların qərarından əvvəl hansısa açıqlama vermək doğru olmaz. Bu məsələ ilə bağlı bütün suallarınızı Baş Prokurorluğa ünvanlayın".

Xatırladaq ki, mayın 19-da "Global Stone" MMC-nin üzlədiyi 16 mərtəbəli binanın yanması nəticəsində 15 nəfər ölüb, 50 sakin yaralanıb. Hadisədən dərhal sonra sosial şəbəkələrdə adıçəkilən şirkətə Standartlaşdırma, Metrologiya və Patent üzrə Dövlət Komitəsi tərəfindən verilən uyğunluq sertifikatının şəkilləri paylaşılıb. Sertifikatın verilmə tarixi 27.11.2012-ci il, bitmə tarixi isə 27.11.2013-cü ildir.