Bakı-Sumqayıt dəmir yolunda relsə daş qoyan şagirdlər saxlanılıb

Bakı. 2 dekabr. REPORT.AZ/ Bakı-Sumqayıt elektrik qatarının hərəkəti Keşlə-Biləcəri mənzilində relsin üzərinə mişar daşlarının iri qırıqlarının düzülməsi səbəbindən dayandırılıb, təhlükəsizlik tədbirləri gücləndirilib. Hadisə nəticəsində qatarların hərəkətində ləngimələrə yol verilib. Bu barədə "Azərbaycan Dəmir Yolları" QSC-nin Mətbuat Katibliyinin rəisi Nadir Əzməmmədovun "Report"a verdiyi məlumatda bildirilir.

Belə ki, Daxili İşlər Nazirliyi Nəqliyyatda Baş Polis İdarəsinin Keşlə xətt polis bölməsinin əməkdaşlarının apardığı əməliyyat-axtarış tədbirləri nəticəsində dəmir yolunun üzərinə daş qırıqları qoyanlar saxlanılıb. Araşdırma zamanı məlum olub ki, saxlananlar Binəqədi rayonu 100№-li orta məktəbin XI sinif və Binəqədi rayonu 143№-li orta məktəbin IX sinif şagirdləridir.

Saxlanılanlar polis bölməsində dindirilərkən hadisəni törətdiklərini etiraf ediblər.

"Azərbaycan Dəmir Yolları" bir daha Bakı-Sumqayıt marşrutu üzrə yaxın ərazidə yaşayan vətəndaşların nəzərinə çatdırır ki, dövlət əmlakına ziyan vuranlar, elektrik qatarının təhlükəsiz hərəkətinə mane olanlara qarşı hüquq-mühafizə orqanları tərəfindən müvafiq tədbirlər görüləcək", - N.Əzməmmədov qeyd edib.