Kukla Teatrı “Tilsimli meşə” adlı yeni tamaşa hazırlayır

Bakı. 7 oktyabr. REPORT.AZ/ A.Şaiq adına Azərbaycan Dövlət Kukla Teatrında yeni tamaşanın məşqləri gedir.

"Report" xəbər verir ki, teatrda bu dəfə klassik nağıl qəhrəmanlarının iştirakı ilə tamaşa hazırlanır. 

Teatrın baş rejissoru Qurban Məsimovun hazırladığı “Tilsimli meşə” adlı nağıl-tamaşa kuklalarının rəngarəngliyi və say çoxluğu ilə də seçiləcək.

Əsasən Məhəmməd və Xəlil adlı iki qardaşın macəralarını, qəhrəmanlıq və sehr dolu aləmdəki mənfi qüvvələrlə mübarizəsini əks etdirən tamaşa uşaqlara mərdlik, cəsarət, əzmkarlıq və mübarizlik kimi hisslər aşılayır.

Tamaşa müəllifinin sözlərinə görə, öz cəsarətini nümayiş etdirmək istəyən iki qardaş uşaqlıqdan qorxulu sehrləri ilə hər kəsi vahiməyə salan tilsimli meşəyə gedib, orada əsir saxlanılan padşahın qızını xilas etməyə çalışırlar. Anasının və ətrafdakıların etirazlarına rəğmən o meşəyə gedən və ifritələr, sehr dolu cadugərlərlə mübarizə aparan qardaşlar əzmləri, qorxmazlıq və fəndgirlikləri sayəsində bütün girovları, eləcə də padşahın qızını xilas edib qəhrəman kimi öz evlərinə dönürlər. Sonradan xilas olanlardan birinin də qonşu ölkənin hökmdarının qızı olması anlaşılır və iki qardaş iki şahzadə ilə ailə qurub nağılın xoşbəxt sonluğuna nail olurlar.

Zəngin səhnə tərtibatlı birhissəli kukla tamaşasında 17-dək kukladan istifadə olunur.

Rejissor bu tamaşa ilə uşaqları az qala unudulmaqda olan, müasir vizual effektlər sayəsində zamanla sıradan çıxan sehr dünyasına, illər öncənin uşaqlarının inandığı nağıl qəhrəmanları ilə tanışlığa, əsl nağıl aləminə, sehr dünyasına səyahətə dəvət edir.

Teatrın baş rəssamı İqbal Əliyevin quruluşçu rəssamı olduğu tamaşanın musiqi tərtibatı da dünyaca məşhur klassik musiqilərdən seçmələrlə tərtib olunub.

Tamaşada əsas rolları teatrın gənc aktyorları Elnur Xəlilov, Cavid Telman, Nərmin Nəbiyeva, Sona Quliyeva, Aygül Ağayeva və İlahə İmanova ifa edir.

Döşəmə kuklaların istifadə olunduğu yeni səhnə işi oktyabrın sonlarında balaca tamaşaçıların ixtiyarına veriləcək.