Xızının Qarabulaq bələdiyyəsinə məxsus torpaq sahəsində baş vermiş yanğın söndürülüb

Bakı. 21 avqust. REPORT.AZ/ Xızı rayon Qarabulaq bələdiyyəsinə məxsus torpaq sahəsində baş vermiş və sonradan geniş ərazini əhatə edərək Qarabulaq meşəbəyliyinin 5 saylı dolayına keçmiş yanğın gecə saat 2 radələrində tamamilə söndürüüb.

Ekologiya və Təbii Sərvətlər Nazirliyinin mətbuat katibi İradə İbrahimovanın "Report"a verdiyi məlumata görə, hadisə 20 avqust 2016-cı il tarixində saat 20:00 radələrində baş verib.

Yanğın havanın küləkli olması səbəbindən geniş ərazini əhatə edərək Qarabulaq meşəbəyliyinin 5 saylı dolayına keçib.

Yanğının qarşısının alınması məqsədilə Ekologiya və Təbii Sərvətlər Nazirliyinin yerli qurumlarının və Fövqəladə Hallar Nazirliyinin Xızı rayon Yanğından Mühafizə Xidmətinin canlı qüvvə və texnikası təcili olaraq hadisə yerinə gedib, eyni zamanda hadisənin ciddiliyi nəzərə alınaraq nazirliyin müvafiq qurumları fövqəladə iş rejiminə keçərək, ETSN-nin Fövqəladə Hallar üzrə Tədbirlər Mərkəzinin lazımi avadanlıqları ilə birlikdə 100 nəfərədək əməkdaş yanğının söndürüməsinə cəlb olunub.

Ərazi yüksək dağ massivində yerləşdiyindən yanğının söndürülməsi üçün mümkün olan bütün vasitələrdən istifadə olunub, o cümlədən nazirliyin yerli meşə idarələrinin və Altı ağac milli parkının işçiəri vedrə və su tutumu olan qablardan istifadə edərək yanğının söndürülməsində iştirak ediblər. Nazirliyin əməkdaşlarının fədakarlığı, şücaəti və ciddi səyləri nəticəsində, çətin şəraitdə həyata keçirilən intensiv tədbirlər nəticəsində yanğın gecə saat 2 radəırində tam olaraq söndürülüb.

Qeyd edək ki, yanğın Xızı rayonunun Qarabulaq bələdiyyəsinə məxsus təxminən 215 hektar ərazini əhatə edib, alovun meşə fondu sahəsinə keçməsinin qarşısı Ekologiya və Təbii Sərvətər Naziriyinin işçilərinin və Fövqəladə Hallar Nazirliyinin Xızı rayon Yanğından Mühafizə Xidmətinin əməkdaşlarının ciddi səyləri ilə alınmış və yalnız 50 sota yaxın meşə sahəsində quru ot örtüyü, kol-kos yanıb, həmin ərazidəki ağacların yarpaqları ütülsə də, onlara ciddi ziyan dəyməyib.

Bidiririk ki, meşə yanğınlarının səbəbləri ilə bağlı mütəxəssislərin apardığı təhlillər və monitorinqlər göstərir ki, baş verən yanğın hadisələrinin çox böyük əksəriyyəti insanların odla ehtiyatsız davranışı, taxıl biçininin yekunlaşmasından sonra biçənəklərə od vuran fermerlərin etinasızlığından irəli gəlir.

Təəssüf ki, insanlar təbiətdə olarkən yanğın təhlükəsizliyi qaydalarına əməl etmir və yarana biləcək fəsadları hesablamırlar. Nəzərə almırlar ki, belə məsuliyyətsiz addımların nəticəsində hektarlarla meşə örtüyü məhv ola, ölkənin meşə fondu ani vaxt içərisində yanıb kül olmaq təhlükəsi ilə üzləşə bilər.

Havaların isti və quraq keçməsi ilə əlaqədar ETSN əhalini təbiət qoynunda olarkən odla ehtiyatlı olmağa, yanğın təhlükəsizliyi qaydalarına riayət etməyə çağırır.