​Şair Saday Şəkərlinin şikayəti əsasında məhkəmə başlayıb

Bakı. 5 iyul. REPORT.AZ Bu gün Bakı Apellyasiya Məhkəməsində hədə-qorxu gəlməkdə təqsirləndirilən şair Saday Şəkərli barəsində olan hökmdən verilən apellyasiya şikayəti üzrə məhkəmənin ilkin baxış iclası başlayıb.

Bu barədə "Report"a şairin vəkili Bəhruz Bayramov məlumat verib.

Onun sözlərinə görə, hakim Camal Ramazanovun sədrliyi ilə keçirilən prosesdə vəkillər iki vəsatət verib. Vəsatətlərdən biri apellyasiya şikayətinə məhkəmə istintaqının aparılması ilə baxılması, digəri isə cinayət işinə xitam verilməsi və həbs-qətimkan tədbirinin dəyişdirilməsi barədə olub. Dövlət ittihamçısı və məhkəmədə tərəf kimi iştirak edən Vergilər Nazirliyinin nümayəndəsi vəsatətlərin əleyhinə çıxıblar və təmin edilməməsini istəyiblər. 

Hakim bildirib ki, vəsatətlərlə bağlı qərar iyulun 8-də açıqlanacaq. 

Məhkəmə prosesi iyulun 8-də davam etdiriləcək.

Qeyd edək ki, Baş Prokurorluğun yaydığı məlumata görə, Bakı şəhər sakini Saday Şəkərovun (Saday Şəkərli) külli miqdarda əmlak əldə etmək məqsədilə Vergilər Nazirliyinin vəzifəli şəxsi haqqında kütləvi informasiya vasitələrində ifşaedici, onu nüfuzdan salan, uydurma yazılar yazmaqla, barəsində rüsvayedici məlumatlar yayma hədəsi ilə tələb etdiyi 10 min manat məbləğində pulu almasında şübhələr üçün əsaslar olduğundan faktla bağlı Cinayət Məcəlləsinin 182.3.2-ci (külli miqdarda əmlakı hədə-qorxu ilə tələb etmə) maddəsi ilə cinayət işi başlanıb. S.Şəkərov iş üzrə təqsirləndirilən şəxs qismində cəlb edilərək, ona Cinayət Məcəlləsinin qeyd edilən maddəsində nəzərdə tutulan ittiham elan edilməklə, məhkəmənin qərarı ilə barəsində həbs qətimkan tədbiri seçilib.

Bu il may ayının 16-da Bakı Ağır Cinayətlər Məhkəməsinin hökmü ilə S.Şəkərli 10 il müddətinə azadlıqdan məhrum edilib. Hökmdən narazı qalan şairin müdafiəçiləri B.Bayramov və Fəxrəddin Mehdiyev apellyasiya şikayəti verib. Şikayətdə S.Şəkərliyə bəraət verilməsi istənilib.