Bakı. 19 noyabr. REPORT.AZ/ Bu gün Bakı Ağır Cinayətlər Məhkəməsində narkotik maddələrin qanunsuz dövriyyəsində təqsirləndirilən Əliyar Əhmədovun cinayət işi üzrə məhkəmə prosesi başa çatıb.
"Report" xəbər verir ki, hakim Faiq Qəniyevin sədrliyi ilə keçirilən prosesdə hökm oxunub.
Məhkəmənin hökmü ilə Ə.Əhmədov 10 il 6 ay müddətinə azadlıqdan məhrum edilib.
Qeyd edək ki, Ə.Əhmədov Astaradan külli miqdarda narkotik maddəni Bakıya gətirərkən saxlanılıb. O, Cinayət Məcəlləsinin 234.4.3 (qanunsuz olaraq narkotik vasitələri, psixotrop maddələri və ya onların prekursorlarını hazırlama, istehsal etmə, əldə etmə, saxlama, daşıma, göndərmə və ya satma, külli miqdarda törədildikdə) maddəsi ilə ittiham olunub.