Evlərdən 1 milyon manatlıq oğurluqda təqsirləndirilən və bəraət alan şəxslərlə bağlı protest təmin edilməyib

Bakı. 13 iyul. REPORT.AZ/ Bakı Apellyasiya Məhkəməsində oğurluq və quldurluq etməkdə təqsirləndirilən İsmayıl Ümid oğlu Qəhrəmanov, Zaur Namaz oğlu Namazov və Fərid Quncəli oğlu Əlibəyovun barələrində olan hökmdən dövlət ittihamçısı tərəfindən verilən apellyasiya protesti və apellyasiya şikayəti üzrə məhkəmə prosesi başa çatıb.

Bu barədə "Report"a vəkil Namiq Hacıyev məlumat verib.

Vəkilin sözlərinə görə, hakim Əflatun Qasımovun sədrliyi ilə keçirilən prosesdə qərar elan olunub.

Qərara əsasən, prokurorun apellyasiya protesti təmin edilməyib. Birinci instansiya məhkəməsinin çıxardığı hökm qüvvədə saxlanılıb. 

Məhkəmə İ.Qəhrəmanovun apellasiya şikayəti üzrə də qərarını elan edib. Məhkəmə onun şikayətini təmin etməsə də cəzasını ciddi rejimli cəza çəkmə müəssisəsində deyil, ümumi rejimli cəza çəkmə müəssisəsində çəkməsi haqda qərar verib. 

Qeyd edək ki, Astara rayon sakini, 1995-ci il təvəllüdlü İ.Qəhrəmanov 2013-cü ildə Nəsimi Rayon Polis İdarəsinin əməliyyatçıları tərəfindən tutulub. İttiham aktına əsasən, 17 yaşlı İ.Qəhrəmanov Bakının müxtəlif rayonlarında onlarla evi qarət edib. Zərərçəkənlərin müraciəti əsasında və ilkin araşdırmalarla müəyyən edilib ki, o, təkcə Nəsimi rayonu ərazisində mənzillərdən 300 min manat dəyərində olan qızıl və müxtəlif valyutalar ələ keçirib. Sonrakı araşdırmalarla peşəkar oğrunun başqa rayonlarda da çoxsaylı mənzilləri talaması məlum olub. Cinayət əməllərinə 2011-ci ildən başlayan İ.Qəhrəmanovun Binəqədi, Nərimanov, Xətai, Nizami rayonlarında onlarla evdən külli miqdarda pul və qızıl ələ keçirməsi aydınlaşıb. İstintaq, həmçinin müəyyən edib ki, İ.Qəhrəmanovun ələ keçirdiyi sərvət 1 milyon manat civarında olub.

İ.Qəhrəmanovla yanaşı, 1983-cü il təvəllüdlü Z.Namazov və 1988-ci il təvəllüdlü F.Əlibəyov da oğurluqda təqsirləndirilərək, saxlanılıb. Lakin hər iki şəxs barəsində başqa yerə getməməklə bağlı iltizam tədbiri seçilib.

İ.Qəhrəmanov Cinayət Məcəlləsinin 177.3.2-ci (oğurluq, külli miqdarda ziyan vurmaqla törədildikdə), 181.3.2-ci (quldurluq, külli miqdarda əmlak əldə etmək məqsədilə törədildikdə), 326.1-ci (rəsmi sənədləri, ştampları, möhürləri oğurlama və ya məhv etmə, rəsmi sənədləri, ştampları və ya möhürləri tamah məqsədi və ya digər şəxsi niyyətlə oğurlama, məhv etmə, zədələmə və ya gizlətmə), 326.2-ci (rəsmi sənədləri, ştampları, möhürləri oğurlama və ya məhv etmə, dənizçinin şəxsiyyət sənədini, vətəndaşın şəxsiyyət vəsiqəsini, pasportunu və ya digər mühüm şəxsi sənədini oğurlama) və Z.Namazovala F.Əlibəyov isə 32.5-ci (iştirakçılığın növləri, cinayətin törədilməsinə məsləhətləri, göstərişləri və məlumatları ilə, cinayət törədilməsi üçün alət və ya vasitələr vermək və ya maneələri aradan qaldırmaqla yardım etmiş şəxs, habelə cinayət törətmiş şəxsi, cinayət alətlərini və ya vasitələrini, cinayətin izlərini, yaxud cinayət yolu ilə əldə edilmiş pul vəsaitlərini və ya digər əmlakı gizlətməyi, belə pul vəsaitlərini və ya digər əmlakı əldə etməyi, onlara sahiblik və ya onlardan istifadə etməyi, yaxud sərəncam verməyi qabaqcadan vəd etmiş şəxs köməkçi sayılır), 177.3.2-ci (oğurluq, külli miqdarda ziyan vurmaqla törədildikdə) maddələri ilə ittiham olunublar.

Bu il fevral ayının 22-də Bakı Ağır Cinayətlər Məhkəməsinin hökmü ilə İ.Qəhrəmanov 10 il müddətinə azadlıqdan məhrum edilib. Z.Namazov və F.Əlibəyov barəsində isə bəraət hökmü çıxarılıb. Hökmdən narazı qalan zərərçəkmiş şəxslər İlqar Zülfüqarovla İlqar Ağayev və məhkum apellyasiya şikayəti və dövlət ittihamçısı apellyasiya protesti verib.