Banklara külli miqdarda borcu olan Azərbaycan vətəndaşı Gürcüstana qaçmaq istəyərkən saxlanılıb

Bakı. 12 oktyabr. REPORT.AZ/ Dövlət banklarına olan külli miqdarda borcunu ödəməkdən yayınmaq məqsədilə Azərbaycandan qaçan şəxs sərhəddə saxlanılıb. Bu barədə "Report"a Dövlət Sərhəd Xidmətinin mətbuat mərkəzindən məlumat verilib.

Məlumata əsasən, oktyabrın 11-də keçirilən əməliyyat-axtarış tədbirləri nəticəsində Balakən rayonu Mazımçay kəndi ərazisindəki zastavanın xidməti sahəsindən dövlət sərhədini Azərbaycandan Gürcüstan istiqamətində pozmağa cəhd göstərən bir nəfər Azərbaycan vətəndaşı, 1974-cü il təvəllüdlü Səməd Qüdrət oğlu Sadıqov saxlanılıb.

Müəyyən edilib ki, S.Sadıqov dövlət banklarına olan külli miqdarda borcunu ödəməkdən yayınmaq məqsədilə ölkəni qeyri-qanuni yolla tərk etmək niyyətində olub.

Fakt üzrə araşdırma tədbirləri davam etdirilir.