Bakıda polis Azərbaycan və Türkiyə vətəndaşlarından ibarət ekstazi satan qrupu tutub

Bakı. 25 sentyabr. REPORT.AZ/ Azərbaycan Daxili İşlər Nazirliyi (DİN) Baş Narkotiklərlə Mübarizə İdarəsinin (BNMİ) əməkdaşları ölkədə nadir hallarda rast gəlinən müxtəlif tərkibli külli miqdarda narkotik və güclü təsirə malik psixotrop maddələri dövriyyədən çıxarıb. Bu barədə "Report"a DİN-in mətbuat xidmətindən məlumat daxil olub.

Belə ki, bir qrup şəxsin ölkəyə gizli yollarla narkotik maddə və psixatrop maddələr gətirib satması barədə BNMİ-nə əməliyyat məlumatı daxil olub. Keçirilən əməliyyat axtarış tədbirləri nəticəsində Türkiyə Respublikasının vətəndaşı, 35 yaşlı Atila Boran Nərimanov rayonu ərazisində saxlanılıb. Onun üstündən, eləcə də yaşadığı evdən 40 qramdan çox kokain, 30 büküm sintetik üsulla hazırlanmış güclü təsirə malik banzay və 50 həb ekstazi aşkarlanaraq götürülüb. Saxlanılan şəxs bildirib ki, 5 ilə yaxındır Bakıda yaşayır. Narkotik maddələrin satışına isə son bir ildə başlayıb. Atila Boran ifadəsində etiraf edib ki, biznes ortağı - Xətai rayon sakini, 28 yaşlı Ramin İsmayılovla əlbir olaraq dəfələrlə Türkiyədən qaçaqmalçılıq yolu ilə Azərbaycana müxtəlif tərkibli narkotik maddələr gətiriblər.

Əməliyyat axtarış tədbirlərini davam etdirən polis əməkdaşları Ramin İsmayılovu da yaxalayıblar. Saxlanılarkən onun üstündən 15 qram kokain və 30 həb ekstazi aşkarlanaraq maddi sübut kimi götürülüb.

İstintaq araşdırmaları ilə müəyyən edilib ki, ölkəyə narkotik maddə gətirərək satmaq təklifini Atila Boran verib. Ramin İsmayılov isə dəfələrlə Atila Borana pul verərək Türkiyəyə göndərib və kokain, banzay, həmçinin ekstazi gətirməyi tapşırıb. Narkotik tərkibli maddələr gizli yollarla Bakıya gətirilib və satılıb. Əldə edilən pullar isə aralarında bölüşdürülüb.

Faktla bağlı BNMİ-də cinayət işi açılıb, istintaq saxlanılan şəxslərin ətrafında araşdırmaları davam etdirir.