Bakı 23° C
https://static.report.az/photo/8b05f3cc-a60f-41a1-8f4c-3b38f19080b4.jpg
Bakı. 8 sentyabr. REPORT.AZ/ Bu gün Bakı ndə "Atrabank" ASC-nin Nəsimi filialının mühasibi, daha sonra isə həmin filialın xidmət şöbəsinin korporativ müştərilərə xidmət qrupunun mütəxəssisi vəzifəsində işləyən Babayev Həsənağa Məmmədhüseyn oğlu, tanışları Şirinov Tərxan Ceyhun oğlu, Rəhimov Elman Hətəm oğlu, Bayramov Hüseyn Yadulla oğlu, Kərimov Əlirza Abuzər oğlu və Cəfərov Səhadət Səməd oğlundan ibarət, Qazıyev Səbuhi Ağabala oğlu isə Rzayev Ramşan Mahir oğlu və Əsgərov Elvin Cəmil oğlundan ibarət mütəşəkkil cinayətkar dəstələrin cinayət işi üzrə məhkəmə prosesi keçirilib.
"Report"un xəbərinə görə, hakim Rasim Sadıqovun sədrliyi ilə keçirilən prosesdə təqsirləndirilən şəxslər ifadə verib.
Təqsirləndirilən T.Şirinov bildirib ki, E.Rəhimov onun adına 278 firma açıb: "Bütün sənədləri də mən özüm imzalamışam".
E.Rəhimov isə bu işdə yalnız özünü günahkar hesab etdiyini deyib.
Proses sentyabrın 17-də davam etdiriləcək.
Qeyd edək ki, ötən ay Vergilər Nazirliyinin Vergi cinayətlərinin ibtidai araşdırılması Departamentində həyata keçirilmiş tədbirlər nəticəsində vergiləri dövlət büdcəsinə ödəməkdən yayındırmaqda təqsirləndirilərək həbs olunmuş mütəşəkkil cinayətkar dəstənin üzvləri ilə bağlı çoxepizodlu və mürəkkəb tərkibli cinayət işinin istintaqı tamamlanıb və ittiham aktı ilə məhkəməyə göndərilib.
Nazirliyin analitik-informasiya şöbəsinin məlumatına görə, istintaq tədbirləri nəticəsində sübuta yetirilib ki, 2011-ci il iyulun 7-də "Atrabank" ASC-nin Nəsimi filialının mühasibi, 2014-cü ilin martın 3-də isə həmin filialın xidmət şöbəsinin korporativ müştərilərə xidmət qrupunun mütəxəssisi vəzifəsində işləyən M.Babayev, T.Şirinov, E.Rəhimov H.Bayramov, Ə.Kərimov və S.Cəfərovdan ibarət, S.Qazıyev isə R.Rzayev və E.Əsgərovdan ibarət mütəşəkkil cinayətkar dəstələr yaradaraq, 2012-2014-cü illər ərzində həmin qrupların fəaliyyətinə rəhbərlik ediblər.
Dəstə üzvlərinin adlarına 107 MMC yaradılıb, həmin cəmiyyətlərin qeydiyyatda olduğu vergi orqanlarına bəyannamə ya təqdim edilməyib, yaxud təqdim edilən bəyannamələrə gəlirlər və xərclər barədə bilə-bilə təhrif olunmuş məlumatlar daxil edilərək, ümumilikdə külli miqdar təşkil edən 1 270 884,46 manat məbləğində vergilər dövlət büdcəsinə ödəməkdən yayındırılıb.
İstintaq-əməliyyat tədbirləri ilə qeyd olunan şəxslər tərəfindən bir sıra cinayət əməllərinin törədildiyi toplanmış təkzibolunmaz faktlarla – ilkin mühasıbatlıq sənədləri, şahid ifadələri, telefon əlaqələrinin təhlili və yoxlanılması, ekspertiza rəyləri və digər istintaq dəlilləri ilə tam sübuta yetirilib. Dövlətə vurulmuş ziyandan 190 550 manatı ödətdirilib, 363 987 manat məbləğində əmlak üzərinə həbs qoyulub.
Cinayətkar dəstənin üzvlərinə Cinayət Məcəlləsinin 213.2.1, 213.2.2, 213.1 və 308.2-ci maddələri ilə ittiham elan edilib, onlardan yeddi nəfəri barədə məhkəmə qərarları ilə həbs qətimkan tədbiri seçilib.
