Bakı. 17 noyabr. REPORT.AZ/ 21 yaşadək futbolçulardan ibarət Azərbaycan millisi AVRO-2017-nin seçmə qrup mərhələsində ilin son oyununu keçirəcək. "Report"un məlumatına görə, Yaşar Vahabzadənin rəhbərlik etdiyi komanda Rusiya yığması ilə üz-üzə gələcək.
Qarşılaşma Bayıl stadionunda keçiriləcək. Seçmə mərhələnin 7-ci qrupunda çıxış edən Azərbaycan millinin aktivində yalnız 1 qələbə var. Komanda yalnız Farer adalarını məğlub etməyi bacarıb. Avstriya və Almaniyaya məğlub olan U-21 rəqib qapısından 2 top keçirib və 16 qol buraxıb. Azərbaycanın 21 yaşadək futbolçuları hazırda 3 xalla qrup 5-cisidir.
Azərbaycan millisi Rusiya ilə oyundan qələbə ilə ayrılarsa, qrupda bir pillə irəliləyərək 4-cü olacaq. Qarşılaşmanı israildən olan Eytan Şmuelevits idarə edəcək.
17:00. Azərbaycan U-21 - Rusiya U-21
Baş hakim: Eytan Şmuelevits
Yan xətt hakimləri: Nissan Davidi, Roy Hassan
Dördüncü hakim: Ziv Adler (hamısı İsrail)
Bakı. Bayıl stadionu
Qeyd edək ki, 21 yaşadək futbolçular arasında Avropa çempionatının final mərhələsi 2017-ci ildə Polşada keçiriləcək.