İngiltərə Premyer Liqasında aprel ayının ən yaxşı baş məşqçisi və futbolçusu bəlli olub

Futbol üzrə İngiltərə Premyer Liqasında aprel ayının ən yaxşı baş məşqçisi və futbolçusunun adları açıqlanıb.

“Report” çempionatın rəsmi saytına istinadən xəbər verir ki, “Everton”un çalışdırıcısı Şon Dayç ötən ayın ən yaxşısı adını qazanıb.

O, Mikel Arteta (“Arsenal”) və Xosep Qvardiolanı qabaqlamaqla (“Mançester Siti”) buna nail olub.

“Çelsi”nin yarımmüdafəçisi Koul Palmer isə aprelin ən yaxşı futbolçusu seçilib. 22 yaşlı oyunçu ötən ay 7 qol və 1 assistə imza atmaqla özündən söz etdirib.

Ayın ən yaxşı futbolçusu mükafatı uğrunda Brunu Fernandeş (“Mançester Yunayted”), Kay Haverts (“Arsenal”), Jan-Filipp Mateta (“Kristal Pelas”) və Cordan Pikford (“Everton”) mübarizə aparıb.

Qeyd edək ki, Koul Palmer Premyer Liqada cari mövsüm 31 matçda iştirak edib, 21 qol vurub və 9 məhsuldar ötürmə verib.