Azərbaycan millisinin baş məşqçisi: İnanırıq ki, daha iki atletimiz Paris-2024-ə vəsiqə qazanacaq

İnanırıq ki, daha iki atletimiz - Nazim Babayev və Yekatrina Sarıyeva da Paris-2024 Yay Olimpiya Oyunlarına vəsiqə qazanacaq.

Bunu “Report”a açıqlamasında atletika üzrə Azərbaycan millisinin baş məşqçisi Hakim İbrahimov deyib.

Mütəxəssis Türkiyənin Antalya şəhərində keçirilən "Olimpik deneme" yarışında yığmamızın üzvlərinin çıxışı barədə danışıb: “Bu yarış bizim üçün yoxlama xarakterli idi. Bununla belə, idmançılarımız yüksək göstəricilərə nail oldular. Komandamızın ən təcrübəli atleti, Avropa çempionumuz Nazim Babayev yarışın ilk günündə uzunluğa tullanmada 7.56 metr göstərici ilə ümidləri doğrultdu. 100 metr məsafəyə qaçışda Lamiyə Vəliyeva birinci yeri tutan digər təmsilçimiz oldu. Kişilər arasında 100 metr məsafəyə qaçışda Əlhəm Nağıyevin ikinci yerə çıxması da müsbət məqamlar arasında idi. Bundan başqa, İsmayıl Əliyev, Fəridə Rzayeva, Orxan Aslanov və Rüstəm Məmmədov üçüncü yerlə kifayətləndilər. Yeniyetmələrdən ibarət millimizin üzvü Toğrul Şahtaxtinski də özünü yaxşı tərəfdən göstərərək, 1-ci pillənin sahibi oldu".

H.İbrahimov planları açıqlayıb: "Qarşıdakı günlərdə atletika üzrə Bakı birinciliyi və Azərbaycan çempionatı keçiriləcək. Bundan başqa, idmançılarımızın bir neçə beynəlxalq yarışlarda iştirakı nəzərdə tutulub. Bildiyiniz kimi, yığmamızın üzvü Anna Skidan Paris-2024 Yay Olimpiya Oyunlarına lisenziya qazanıb. Ümid edirik ki, digər idmançılarımız da bunu bacaracaqlar”.

Millimizin çalışdırıcısı İsveçrənin Lozanna şəhərində iştirak etdiyi seminarla bağlı məlumat verib: “Olimpiya Həmrəyliyi Fondunun maliyyələşdirdiyi və ABŞ Olimpiya və Paralimpiya Komitələrinin həyata keçirdiyi Məşqçiliyin Təkmilləşdirilməsi üzrə Beynəlxalq Sertifikasiya Proqramında iştirak etdim. Bildirmək istəyirəm ki, ən yüksək bal toplayan mən olmuşam. 13 ay təhsilim davam etdi. Dərslər ilk 6 ay ərzində onlayn keçirildi. 9 mövzu ilə bağlı təhsil alırdım. Daha sonra 3 həftə ABŞ-də səfərdə oldum”.