​SOCAR prezidenti Bakı Ali Neft Məktəbinin tələbələri ilə görüşüb

Bakı. 30 yanvar. REPORT.AZ/ Yanvarın 29-da Gənclər günü ərəfəsində SOCAR prezidenti Rövnəq Abdullayev Bakı Ali Neft Məktəbi tələbələrinin böyük bir qrupu ilə görüş keçirib. Bu barədə "Report"a SOCAR-ın mətbuat xidmətindən məlumat verilib.

Məlumata görə, görüşün əvvəlində Məktəbin dosenti Xanım Cəfərovaya SOCAR-ın Fəxri Fərmanı təqdim olunub.

SOCAR prezidenti R.Abdullayev tələbələrin müəllimlərini böyük coşqu ilə alqışlamasına sevindiyini bildirib, mühəndislər üçün riyaziyyat fənninin böyük əhəmiyyətindən söz açıb, özünün də vaxtilə ona dərs demiş riyaziyyat müəllimləri ilə əlaqəsini davam etdirdiyini söyləyib.

X.Cəfərova əməyinə verilən qiymətə görə SOCAR rəhbərliyinə minnətdarlığını bildirib, BANM-də işləməyindən qürur hissi keçirdiyini vurğulayıb.

SOCAR prezidenti tələbələri qarşıdan gələn Gənclər günü münasibəti ilə təbrik edib, gənclərə onları maraqlandıran bütün suallarla müraciət etmək imkanı yaradıb, verilmiş sualların hamısını ətraflı cavablandırıb. Tələbələr SOCAR-ın və BANM-in fəaliyyəti, inkişaf perspektivləri, dünya neft sənayesində baş verən proseslərlə bağlı SOCAR prezidentinin mövqeyi ilə tanış olublar.

Gənclər SOCAR əleyhinə sosial şəbəkələrdə aparılan qərəzli anti-reklam kampaniyasının əsas mövzularını təşkil edən məsələlərə də aydınlıq gətirilməsini xahiş ediblər. SOCAR prezidenti R.Abdullayev dekabrın 4-də dənizdə təbii fəlakət zamanı Neft Daşlarında və “Günəşli” yatağındakı 10 saylı özüldə baş vermiş qəzalar nəticəsində itkin düşən neftçilərin axtarışı istiqamətində aparılan tədbirlərə, həmin faciədə həlak olanların və itkin düşənlərin ailələrinə maddi və mənəvi yardımların göstərilməsinə, Gürcüstandakı dini məbədlərə SOCAR-ın hesabına qaz verilməsi ətrafında süni surətdə yaradılmış qalmaqala və sosial şəbəkələrdə aktual olan bir sıra başqa məsələlərə münasibətini bildirib.

Azərbaycanda qazlaşdırma səviyyəsinin guya aşağı olmasına dair fikirlərə toxunan R.Abdullayev deyib ki, bu fikirlər yanlış və əsassızdır: "Diqqət yetirin, Azərbaycanın həm şimal, həm də cənub qonşuları dünyanın güclü qaz dövlətləridir. Amma buna baxmayarq, bizdə qazlaşdırmanın səviyyəsi bu ölkələrin hər ikisindən xeyli yüksəkdir. Dövlətimizin başçısı bizim qarşımızda məsələ qoymuşdur ki, ən əvvəl ölkə daxilində əhalinin qaz təminatını yüksəldək. Hazırda Azərbaycanda qazlaşdırmanın səviyyəsi 90% təşkil edir. Avropaya qaz ixrac etməyə başlayanda biz bu səviyyəni daha da yüksəldəcəyik”.

Görüşdə BANM-in tələbələri SOCAR prezidentinə uğurlu karyerasının sirləri, həyatda uğur qazanma yolları haqqında da çoxsaylı suallar verib, onun fəaliyyətinin müxtəlif tərəfləri ilə maraqlanıblar. R.Abdullayev dövlətin gənclər siyasətindən, Azərbaycanda, o cümlədən SOCAR-da gənclərin karyera yüksəlişi üçün yaradılmış imkanlardan ətraflı danışıb, fikirlərini öz həyat və fəaliyyət yolundan gətirdiyi misallarla əsaslandırıb. SOCAR prezidenti tələbələrlə canlı dialoq şəklində qurulmuş görüşün əhəmiyyətini vurğulayıb, belə tədbirlərin bundan sonra da mütəmadi olaraq keçiriləcəyini söyləyib.

Görüşün sonunda tələbələr SOCAR prezidenti ilə şelfi çəkdiriblər.