Hazırda SOCAR-da 51,2 min işçi çalışır

Bakı. 3 iyun. REPORT.AZ/ Azərbaycan Dövlət Neft Şirkətində (SOCAR) hazırda 51 209 nəfər işçi çalışır. "Report" xəbər verir ki, bunu Bakıda keçirilən Beynəlxalq Xəzər neft-qaz konfransında çıxış edən SOCAR-ın kadr, rejim və informasiya texnologiyaları üzrə vitse-prezidenti Xalik Məmmədov bildirib. 

Onun sözlərinə görə, işçilərin 12%-i rəhbər vəzifədə çalışır, 19%-i mütəxəsis, 69%-i fəhlələrdir: "Yaş qrupuna görə isə 30 yaşa qədər olan işçilər 14%, 41-50 yaş qrupları üzrə 20%, 31-40 yaş üzrə isə 22%, 51 yaşdan yuxarı olanlar isə 38% təşkil edir. Təhsilə görə, 32%-i ali, 13%-i orta ixtisas, 5%-i peşə, 50%-i isə orta təhsillidir. Kişilər 83%, qadınlar 17%-dir". 

"Şirkətdə 35 nəfər elmlər doktoru, 225 nəfər elmlər namizədi çalışır", - deyə SOCAR rəsmisi qeyd edib. 

X.Məmmədov SOCAR-da işə qəbul prosesindən danışaraq bildirib ki, işə qəbulla bağlı SOCAR-a 174 570 müraciət daxil olub. SOCAR tərəfindən 3 889 vakansiya elan olunub, 32 141 vakansiya üzrə test imtahanları təşkil olunub: "6 523 mühəndis-texniki işçi üçün müsabiqə təşkil olunub, fəhlə kateqoriyaları üçün 6 500 müsabiqə olub. Müsabiqədən uğurla keçən işçilərin sayı isə 3 753 nəfərdir. Buradan görünür ki, işə qəbul prosesində şəffaflıq tam təmin olunub, SOCAR-a qəbul prosesində daha yaxşı, daha keyfiyyətli işçiləri qəbul etmək imkanı yaradılıb".