Meksikada hərbçilərə hücum nəticəsində 4 nəfər həlak olub

Bakı. 30 sentyabr. REPORT.AZ/ Meksikanın Sinaloa ştatında Kuliakan şəhəri yaxınlığında hərbi patrula edilən hücum nəticəsində 4 nəfər həlak olub, 11 hərbçi yaralanıb.

"Report"un RİA "Novosti"yə istinadən verdiyi xəbərə görə, hücüm səhər saatlarında Mexiko-Noqales yolunda baş verib.

Naməlum şəxslər bundan əvvəl atışmada yaralanan cinayətkarı aparan təcili yardım maşınına və onu müşayiət edən konvoya hücum ediblər. Onların məqsədi yaralını azad etmək olub.

Döyüş nəticəsində iki hərbi avtomobil tamamilə yanıb. Avtomobilin salonunda maşından çıxa bilməyən hərbçilər qalıblar. Üç əsgər və feldşer həlak olub. 

Cinayətkarlar arasında ölənlərin olub-olmadığı barədə məlumat verilmir.