Bakı. 19 aprel. REPORT.AZ/ Əfqanıstanın paytaxtı Kabildə bu gün səhər saatlarında içərisinə partlayıcı qurğu yerləşdirilmiş avtomobil partladılıb. "Report" yerli KİV-ə istinadən xəbər verir ki, partlayış Əfqanıstan Milli Təhlükəsizlik Agentliyinin (MTA) binası yaxınlığında həyata keçirilib.
Müdafiə Nazirliyi, Maliyyə Nazirliyi və MTA binalarının yerləşdiyi Pul-e-Mahmud Xan rayonunda atəş səsləri eşidilməkdədir.
Əfqanıstan prezidenti Əşrəf Qəni Kabilin mərkəzindəki partlayış nəticəsində ölən və yaralananların olduğunu bildirib.
Yerli xəstəxananın nümayəndəsinin sözlərinə görə, partlayışdan sonra tibb müəssisəsinə 8 yüngül yaralı hərbçi gətirilib. Yaralılar barədə dəqiq məlumat açıqlanmır.
Amma yerli KİV partlayış nəticəsində 24 nəfərin öldüyünü xəbər verib. Terror hücumuna görə məsuliyyəti taliblərin üzərlərinə götürdükləri də verilən məlumatlar arasındadır.
*** 08:53
Əfqanıstanın paytaxtı Kabil şəhərində partlayış baş verib. "Report" "Reyters"ə istinadən xəbər verir ki, partlayış səsi ABŞ-ın bu ölkədəki səfirliyində də eşidilib.
Şahidlər geniş ərazinin tüstüyə büründüyünü bildiriblər.
Yerli mətbuat isə son günlər ölkədə "Taliban"çıların fəallaşdığını vurğulayıb.
Hələlik ölən və yaralananlarla bağlı məlumat verilmir.
Faktla bağlı araşdırma aparılır.