Əfqanıstan höküməti ilə Taliban arasında danışıqlar fevralın sonunadək baş tuta bilər

Bakı. 6 fevral. REPORT.AZ/ Birləşmiş Ştatlar, Çin, Pakistan və Əfqanıstan nümayəndələri Kabil hökuməti ilə Taliban qruplaşması arasında birbaşa danışıqların keçirilməsinə dair razılıq əldə ediblər.

"Report" "Amerikanın səsi"nə istinadən xəbər verir ki, İslamabadda toplaşan dörd dövlətin nümayəndəsi Taliban liderlərini bu ayın sonuna qədər keçirilməsi nəzərdə tutulan sülh danışıqlarında iştirak etməyə çağırıb.

Dördtərəfli Koordinasiya Qrupunun üzvləri bildiriblər ki, Əfqanıstanda sülhə dair "yol xəritəsi" siyasi nizamlanma və zorakılıqlara son qoyulması istiqamətində mərhələləli prosesi nəzərdə tutur.

Taliban bu görüşdə iştirak etməyib və bu qruplaşma üzvlərinin sülh danışıqlarına qatılıb-qatılmayacağı da hələlik məlum deyil.