ANAMA: Göygöl rayonunda 1859 ədəd müxtəlif növ hərbi sursat aşkarlanaraq zərərsizləşdirilib

Bakı. 25 iyul. REPORT.AZ/ Azərbaycan Respublikası Ərazilərinin Minalardan Təmizlənməsi üzrə Milli Agentlik (ANAMA) iyulun 25-də Göygöl rayonunda aşkar olunmuş Partlamamış Hərbi Sursat (PHS) haqqında hesabat yayıb.

"Report"un ANAMA-ya istinadən verdiyi xəbərə görə,  hesabatda bildirilir ki, iyulun 25-də saat 15:11-də Fövqəladə Hallar Nazirliyinin Böhran Vəziyyətlərində İdarəetmə mərkəzindən agentliyə Göygöl rayonu, Yeni Zod kəndində yerli sakinə məxsus həyətyanı sahədə partlamamış mərminin aşkar olunması barədə məlumat daxil olub.

Məlumata əsasən, ANAMA-da yaradılmış xüsusi mobil çevik əməliyyat qrupu dərhal həmin əraziyə göndərilib. Agentliyin mütəxəssisləri tərəfindən aparılan əməliyyat tədbirləri nəticəsində 1859 ədəd müxtəlif növ sursat (7 ədəd – F1 əl qumbarası, 10 ədəd - UZRQM əl qumbarasının zapalı, 1 ədəd – VOQ-17 tüfəng qumbarasi (ASQ), 1790 ədəd – 7-62 çaplı LPS snayper PK gülləsi, 50 ədəd – 5-45 çaplı avtomat gülləsi və 1 ədəd - “Dyankov” əl qumbarası) aşkar edilərək, götürülüb və zərərsizləşdirilməsi üçün mərkəzi məhvetmə ərazisinə daşınıb.

Bundan əlavə, tapılan sursatların ətrafında 500 kv.m əraziyə yerüstü baxış keçirilib, təhlükəli əşya və qurğu aşkar olunmayıb.