Şəki və Cəlilabadda istifadəyə yararsız bitkiçilik məhsulları aşkar edilib

Bakı. 23 sentyabr. REPORT.AZ/ Kənd Təsərrüfatı Nazirliyi yanında Dövlət Fitosanitar Nəzarəti Xidməti Şəki rayonundakı bitki və bitkiçilik məhsullarının satışı obyektlərində 195 kq karantin tətbiq edilən zərərli orqanizmlərdən olan kartof güvəsi (Phthorimaea operculella Zell) ilə yoluxmuş, mənşəyi Tovuz rayonuna məxsus olan kartof məhsulu aşkar edib. 

Bu barədə "Report"a nazirlikdən bildirilib. 

Məlumata görə, kartof güvəsinin təhlükəliliyi nəzərə alınaraq məhsul karantin tətbirləri sisteminə riayət etməklə məhv edilib.

Bundan əlavə, Cəlilabad rayonu ərazisində yerləşən topdan və pərakəndə satış mərkəzlərində 3 800 kq kartof güvəsi ilə sirayətlənmiş kartof məhsulu və tərkibində nitratın miqdarı normadan artıq olduğu üçün 135 kq üzüm məhsulu satışdan cıxarılaraq məhv olunub. 

Qeyd edək ki, kartof güvəsi kartofun, badımcanın, pomidorun, bibərin, tütünün və quşüzümü fəsiləsinə aid yabanı bitkilərin karantin zərərvericisidir. Anbar və digər saxlama yerlərində diapauzaya düşmədən il boyu çoxala bilir. Zərərverici yumurta, tırtıl və pup mərhələsində yoluxmuş kartof yumrularının daşınması və əkilməsi yolu ilə yayılır.

Güvə ən çox kartofa ziyan vurur. Zədələnmiş yumrular tez xarab olur, xəstəliklərə güclü yoluxur, görkəmini və əmtəəlik keyfiyyətini itirir. Tırtıllar tərəfindən zədələnmiş tütün yarpaqları siqaret hazırlanması üçün yaramır. Kütləvi çoxaldıqda sahədə və ya çardaq altında müvəqqəti saxlanılan kartof yumrularını 2-3 həftə ərzində tamamilə məhv edə bilir. Zərərverici 25-80% məhsul itkisinə səbəb olur.